Ślązoki i Gorole, Gwara Śląska ( Wiersze )
[ Pobierz całość w formacie PDF ]
Ślązoki i Gorole
Opowiyść trza napoczynać,
w imię Ojca,Ducha, Syna,
Bydzie łono ło Ślązoku,
co jeszcze łońskigo roku,
wszystkim godoł nałokoło,
że na Śląsku niy wesoło,
Narobiło się łod czasu,
jak Gorole prziszli z lasu,
Z cołkij Polski się zjechali,
i nom tu nawyrobiali.
Chop tyn kery tak przezywoł,
August Kula się nazywoł.
Kludził tyż swe narzykanie,
na te gorolskie godanie.
Że po Śląsku się mondrujom,
ślonskij godki niy szanujom,
że som za inteligyntni,
i ślonzokom fest niychyntni,
Godoł tyż że tak łod niego,
byłoby coś zależnego,
to Gorole by jechali
tam kaj downij se miyszkali.
Roz na wiosna prawie w maju,
kiedy ptoszki już śpiywajom,
Poszoł August w ponć do Piekor,
a to ni ma fest daleko,
Bo tradycjo ślonsko koże.
Do Piekor do Matki Bożyj,
Iść roz na rok i porzykać,
za siebie za fest grzesznika.
August tam oprócz rzykanio,
wysłuchoł mszy i kozanio.
A potym jak już do dom szoł,
to przigoda fest szpetno mioł.
Dwa chachary go chyciły,
po gymbie mu nawaliły,
potym nowo tasza wziyni
i zbitego łostawili.
Przi piekarskij leży drodze,
August Kula zbity srodze.
I ratunku nawołuje
możno kto się ulituje?
Łoroz parafiany idom,
możno do mnie dobrzi bydom?
Wszysczy różaniec rzykajom,
i do Augusta godajom.
Po co chopie na pielgrzimka,
wzioneś z sobom piwa krzinka,
i naprany teraz leżysz,
czy w Ponboczka aby wierzisz?
August fest był załomany,
przeca wcale niy naprany.
Ale możno mu pomoże,
chop co jedzie na motorze?
Dobry! Jada pograć w szkata,
i po drodze wezna brata.
Możno inny Ci pomoże,
no to trzimej się „Szczynść Boże”,
Potym chop jechoł na kole,
Pieronie! Musi Cie boleć,
pogapił się pożałowoł
i dalij popyndalowoł.
Aż wreszcie przejyżdżoł Gorol,
stanoł volcwagynym Polo,
i Augusta pobitego,
wsadził do ałta swoigo.
Potym zwiózł do szpitala,
som na rynkach wniósł na sala,
I doł siostrze dziesiynć złotych
by mu sok kupiła po tym.
Morał z tego taki płynie,
że Ślązoki i Gorole,
mogom być czasami świynci,
ale mogom tyż być świnie!
Po co wiync uogólnienia,
po co zatym te podziały,
skoro to w codziynnym życiu,
bywo z nich pożytek mały.
[ Pobierz całość w formacie PDF ]